Kisó Trás di Son!

 
Nunka n tinha falod de traboi de Djinho Barbosa antes. Ma por hoje ser dia, digamos, de verdader lançament de se traboi, txam aproveita pam dze dos kusinha sobre ess traboi. N dze "verdader" pamo tud gente k akompanhá ess traboi sabê ma teve um apresentação na kintal de Palácio de Kultura Ildo Lobo na ano passado, k ka txga a ser um lançamento na verdader dimensão de "Trás di Son".

Hoje na Centro Cultural Francês de Praia, tita ba realizá um koncerto de Son, Imagem i Palavras, kom realização de Djinho Barbosa (na produção musikal) i César Schofield i João Vieira (na produção visual). Ideia e kriá um dimensão sonoro-visual-textual k e o k realmente "Trás Di Son" e!

Txeu gente kun fala ma es sobre ess traboi (kes pok e k'uvil) es transmitim, sempre, um opinião meio desnorteod, digamos assim. Txeu des dzem ma es fka k impressão ma CD e um bokod "misturod" em termos de ritmos, estilos i mesmo de sonoridades (timbres utilizods). De Certa forma es tem razão! Trás di Son e isso mesmo: um prokura de sons, timbres, estilos, formas de interpretá, de kriá, de apresentá!! Ma klaro k nem sempre, i dado ao hábito k no tem estod ta tem na nos meio musical profissional (k tem estod ta faze txeu traboi comercial de bom kualidade), ta fka difícil digeri a primera um traboi apresentod assim.

No tem estod ta assisti a kuase um ditadura de "trabalhos akústikos" k kuase ja vrá primera regra pa traboi ser aceite na ess meio (mute pikni) de apreciação musikal. E kuase um show hoje em dia uvi um artista ou ate pseudo-artistas ta dze "nha novo projecto e um projecto akústiko, bla bla bla bla.."!! Kual e'!!! Musika e musika não obstante monera kel e tokod!! Akústiko, eléctriko, electróniko.. el tem e k'tem kualidade i toká gente na alma!!(pa ser breve!). Pois, traboi de Djinho pode ser konsiderod um traboi de fusão de isso tudo!! Acima de tudo um traboi bastante ousod i desprendido de kritérios imposto pa "kel tal produtor", k kre antes de mas nada agrada estrangeiros, k sinceramente kata intende mute de musika i k'ta otxá ma "afrikano" tem e k toká mal i sempre na kes mesmo linha de koncepção reduzid i desprovido de rikezas harmónicas (rekorendo a Kuame Gamal) i ousadias em termos de arranjos i mesmo de produção musikal em si, na estudio!!

Pois, primer passo pa txá musika de Djinho Barbosa tx'gá na bo: despi de prekonceitos!! Esvaziá bo kabeça (Bari Kabeça) de imposições komerciais de musika de cabo verde! Eskce o k já foi fete.. ou k'já bo uvi. Simplismente po kel CD i tentá akompanhá kes musikas k ses letras pa frente, porke kada arranjo tem tud a ver k kel texto, k kel sonoridade usod.. k kel artista konvidod.

Klaro esta k ess e um traboi independente, i nos tud sabe k num traboi independente orçamento e muitas vezes bastante reduzid. Alguem tem k konta k boa vontade de outras pessoas i produção kata ser realmente moda no kre! Isso pa dze k e normal k pode tem koisas na CD k realmente podia ser fete de ot forma: um exemplo des e txeu rekurso a programações i sekuenciamentos em vez de po mesmo um baterista ou baixista ta toka! N ta kerditá k se produção tivesse orçamento suficiente pa isso katinha duvidas ma tud kes musikas era tokod mesmo em vez de ser programod, o k k tambe kata txa de ser um forma de toká. I depos tem kel kestão de disponibilidade de músikos li na Praia pa faze isso (isso e ot estória pa tratá dpos: porke k músikos ta tão difícil na ess terra??). Ma pronto, o k kun kre dze, e k important li e kel konceito i não forma kel e apresentod!

Trás di Son de Djinho Barbosa konsegui um feito k ate então n ka oia nenhum artista independente (sem produtor xeio de lobbys i defeitos) faze: reuni tonte músikos! Sim, leque de músikos ta bai desde de grandes profissionais i pilares de nos kultura (Paulino Vieira, Kaká Barbora, Kim Alves, Albertino, Russo, etc...) a ilustres deskonhecido(a)s (Annie, Xiomara, Claudia, Debbie, etc...)!! Kada músiko konvidod trazê um parte del mesmo pa ess projecto! Trazel sem pretensões, sem imposições.. simplismente k txeu vontade de kontribuí pa um projecto bnite i xei de alma!!

Pa terminá: n ta dze sempre txeu pessoas k kond es kre de certa forma intende emdjor ess CD, pes uvi primer ultima musika "Son Kompiladu", pes uvil k muita atenção.. pes segui kel mensagem k Djinho kria transmiti tonte a nível musikal komo líriko! Sim... axo k so dpos de "intendê" mensagem dess tema e possível intendê resto de CD!

O kun eskreve li e pok pa expliká o k realmente ta "pasá" na CD de Djinho, por isse, kem k puder, bai hoje na CCF 21:30. I se kalhar algum kosa kun dze li e kapaz de faze sentido.

**Trás di Son, di Imagen, di Palavra**
CCF - Praia 21:30 entrada 300$00
Djinho: Keyboard, Guitarra Akustika & Voz
Ricardo de Deus: Piano
Kiso Oliveira: Baixo Electriko
Duka: Guitarra Electrika & Keyboard
Jorge Pimpa: Bateria
Victor Bettencourt: Percussao
...& konvidados surpresa!!


...Bzot fka dret!